اسمعيهــا كلمــة حكمــة .. هقـولك كلمــة في نفسـي
أنا حارس أمنك وعدلك .. بهديكِ روحي في كفي
رافع عشانــك سلاحي .. وشايـل على إيدي كفني
طول عمري حِماكِ حتى ... وأنتِ قصماني من نصي
وعيوني عليكِ سهرانة .. من غير ما عليا تبصي
مجهــول وأنا حتى شهيـدك .. متكتبش في تاريخك اسمي
*
اسمعيهــا كلمــة حكمــة .. هقـولك كلمــة في نفسـي
تضربيني تعذبيني .. أمرك على راسي يمشي
تبعديني وتسيبني .. عمري ما هسيبـك وأمشي
أنتِ نوري وأنتِ ضيي .. وأنتِ قمرايتي وشمسي
أنتِ حلمي وأنتِ بكره .. وأنت تاريخي وأمسي
عشانك أنا بعت عمري .. بعـت روحـي بعـت نفسي
*
اسمعيهــا كلمــة حكمــة .. هقـولك كلمــة في نفسـي
راهب في حب أرضك .. مع إنى جواكِ منسي
بصـرخ بأعلى صـوتي .. وأنطق اسمك في همسي
ليـه ورا الكدبة بتجري .. وليـه عند الحقيقـة تنسي!!
إمتى تشوفي حقيقتي!! .. وإمتى بجرحي تحسي!!
إمتى تعلي برائتى!! .. ومن جواكِ ليا تصفي!!
ده أنتِ مهما تصدي حضني .. عمــرى ما هسلم ليأسي..
*
اسمعيهــا كلمــة حكمــة .. هقـولك كلمــة في نفسـي
أنا هفضل حِمَاكِ وضهرك .. أفديكِ بروحي ونفسي
عمرى ما هسيبك في ضعفك ... لو مهما عليا تقسي
بكره بعنيكِ تشوفيني.. وأنا بحميكِ من الأعادي
تجري عليا وتحضنيني.. وتحتفلي معايا بميلادي
وبعلمك تزينينى.. وأنا بنزف يوم استشهادي
ساعتها بس هتعرفيني .. وتجيلي وعلى شطي ترسي
وفي تاريخك تذكريني .. وتندهي عليــا باسمي
بس إوعي النهــارده تفتكريني .. وترجعي بكــره تنسي
ده أنا ابنـك.. أنا شهيــدك
أنا في حبــك العاشـــق المنـسي
اسمعيهـــا كلمــة حلــوة .. عايز أقولهــا بأعلى حسـي
بحبــك .. يا بلـدى بحبــك ..
هي الكلمــــة إللي في نفسـي
*
#كلمة_في_نفسي
بقلم
#ميسون_سرور
ليست هناك تعليقات:
إرسال تعليق